Leikskólinn Gullborg

Leikskólastarfið miðast alltaf við að barnið er í brennidepli og allir starfshættir miðast við þroska og þarfir hvers barns. Helstu námssvið sem mynda kjarnan í uppeldisstarfinu eru:

• Leikurinn
• Mál og málörvun
• Listsköpun
• Tónlist
• Hreyfing
• Útivist
• Náttúran og samfélagið
• Könnunarleikur

Leikurinn kjarninn í uppeldisstarfinu í leikskólanum og er hann aðalleiðin til að ná markmiðum námskrár. Leikurinn er eðlilegasta tjáningarform barna og leiðirnar sem notaðar eru til að þau geti notið sín í leiknum eru í gegnum hópastarf, leik inn á deild, útivist og með daglegu lífi í leikskólanum. Barnið fær nógan tíma til leiks með þroskavænlegum leikföngum og viðeigandi efnivið. Kennarar taka þátt í leik barnsins út frá starfsaðferðum sem þeir hafa sett sér í daglegu starfi. Í leik inni á deild velur barn úr ákveðnum viðfangsefnum og einnig fær það að koma með sínar eigin hugmyndir. Þannig fær það tækifæri til að taka sjálft ákvarðanir og koma skoðunum á framfæri. Í útivist er stuðlað að hollri hreyfingu með skemmtilegum leikjum í jákvæðu, skapandi og öruggu umhverfi.

Í leikskólanum er lagður grunnur að málþroska barna vegna þess að málið er  mikilvægt tjáningarform til samskipta.  Lögð er áhersla á málþroska með daglegum  samtölum, lestri bóka, hlustun, framsögn, söngvum, þulum og kvæðum í gegnum sögu- og ljóðagerð sem stuðla að hugtakaskilningi og leik að orðum.  Málörvun er fléttað inn í  alla þætti leikskólastarfsins og birtist sem líkamleg tjáning, sem talmál og í ritmáli.

Deildarstjórar bera ábyrgð á að málörvun barnanna eigi sér stað  í gegnum daglegt starf.

Í gegnum listsköpun fá börnin tækifæri til að skapa og túlka sem hefur áhrif á tjáningu  þeirra. Börnin kanna margskonar efnivið, eðli hluta og eiginleika.  Börnin þjálfa samhæfingu augna og handa og fínhreyfingar eflast.  Sköpunarþörf barna er mikil og þau tjá tilfinningar sínar með því að snerta, þreifa, lykta, uppgötva og rannsaka umhverfi sitt. Þau teikna, mála og móta eftir eigin hugmyndum í gegnum náttúruleg og endurunnin efni.

Deildarstjórar bera ábyrgð á að barnið njóti listsköpunar í daglegu starfi.

Tónlistarþroska og tónlistarlæsi öðlast börn smám saman með því að fá fjölbreytta reynslu af tónlist og kynnast virkri hlustun, næmni fyrir hljóðum, hljóðfærum og tónum. Unnið er með tónlist í skipulögðum hópum og einnig í daglegu lífi sem ýtir undir sjálfsprottinn söng og lífsgleði.

Leitast er við að flétta saman hljóð, takt og hreyfingu, sem örvuð eru með því að vinna með mismunandi hljóð og hljóðfæri í umhverfinu, sem einnig vekur ánægju og áhuga barnsins. Daglega er fengist við söng, rím og ljóðagerð. Með þessu eykst áhugi barnsins á mismunandi tónlist og fjölbreytta menningu í tónlist.

Markmið útivistar er að  auka  þol og hreysti barnanna,  sem einnig eykur  félagsþroska og samskipti þeirra.  Lögð er áhersla fjölbreyttan efnivið og farið er í gönguferðir.

Deildarstjórar bera ábyrgð á að börnin fái góða og holla útivist.

Börn hafa ríka þörf fyrir að hreyfa sig frjálst og óhindrað. Í leikskólanum er lögð áhersla á hreyfiuppeldi. Hreyfing eykur líkamsskynjun og barnið nær smám saman betri stjórn á hreyfingum sínum sem hefur áhrif á sjálfsmyndina. Í hreyfileikjum öðlast barn skilning á styrk sínum, getu og fær útrás. Samhæfing hreyfinga, jafnvægi og öryggi barnsins eykst. Í útiveru skynjar barnið umhverfi sitt og kemst í snertingu við náttúruna í gegnum leikinn.

Börnin upplifa náttúruna og tengjast henni á jákvæðan hátt.  Þau læra að virða hana og umgangast rétt.  Umhverfi leikskólans býður fjölbreytta möguleika á að kanna og uppgötva náttúruna.  Stutt er í fjöru sem býður upp á  óendanlega möguleika á að njóta umhverfis sem yfirfært er í daglegt starf og leik.

Leikskólinn nýtir þau menningarlegu og félagslegu tækifæri sem umhverfið og samfélagið gefur kost á.  Leikskólinn mótar sitt starf út frá innri og ytri aðstæðum í samfélaginu.  Þar ríkja reglur sem allir þurfa að fara eftir og  börnunum er kennt  að fara eftir þeim.

Á yngstu deild leikskólans er unnið með könnunarleikinn (Heuristic play with objects) sem börnin stjórna sjálf á eigin forsendum.

Markmið leiksins er að barnið fái að kanna með skilningarvitunum fimm; þau eru snerting, lykt, bragð, heyrn og sjón, ásamt hreyfiþroska. Barnið fær að vinna frjálst með verðlaust efni t.d. tómar dósir, hólkar, rennilásar, gamlir lyklar, hárburstar, matarílát og margt fleira sem býður upp á óteljandi möguleika. Það fær að nota forvitni sína óhindrað og einbeita sér að viðfangsefninu á rúmgóðu svæði. Kennarinn er alltaf til staðar en er ekki virkur þátttakandi í leiknum. Hann er einungis til taks fyrir börnin þurfi þau á aðstoð hans að halda.